Kākā rāua ko Kiwi Parure

Koinei tētahi o aku tuhinga tuatahi i tā mātau hui i tū ki Rotorua. I hoatunga mai e Kararaina rāua ko Brian tēnei pepa ki a mātau, ā, ko te mahi he tuhi i ngā kōrero mai i te tirohanga o ngā kararehe, ā, i roto i tēnei tuhinga ko Kākā rāua ko Kiwi Parure.

From the Kaka's perspective - what are these people doing here interfering with my life? There is the constant intrusion of humans on their habitat and their personal space, the tracking devices and the animals that are used to locate them.

Te tuhinga ...


"Keteketē, keteketē," te tangi a te Kākā. "Kiwi parure, kai kōna koe?" Kai runga a Kākā i tana rākau pirau. Kua hua kē ōna pīpī. Kua pakeke. Kua rere noa atu. "E Kiwi, kāti te whakaturi mai i a koe! Kai te mōhio tonu au kai te rongo mai o taringa koi," te kī atu a Kākā. "Kua keokeo katoa aku taringa i tō reo pararē e Kākā, waha papā," te ui atu a Kiwi parure.

"He take korero taku e nguturoa!" te korero a Kaka. Ka noho a Kaka ki te whakamarama atu i tana kaupapa ki a Kiwi. Kai reira a Kiwi e āta whakarongo ana, e mīharo ana ki ngā kōrero a Kākā. Kua putē ke ōna whatu kāpō. "E kī, he huruhuru hiriwa? He whatu whero? He pihi tōna? He pī, pī, pī tōna tangi?" "Ai, Kākā, kātahi rā ngā kōrero teka ko ēna!" Ka wherahia e Kākā ōna parihau, ka topa atu ki te hinau a Kiwi. "He pono tonu ōku kōrero, ngutu roa!

Tae mai ana taku huanga, ka kite koe. E! Ka kite o whatu kāpō na!" Te kī a Kākā.

Ka tae mai te huanga ā Kakā. Ā, nā te koi o ana taringa ka rongo a Kiwi i te huanga a Kākā e pī, pī, pī mai ana. Ka whakatata atu a ia, ka āhua kite i te huruhuru hiriwa e mau ana ki tōna tuara. Tūpono atu hoki ki te taura e mau ana ki tōna rekereke.

"Aue! Kua pā te ringa waewaerua ki tō huanga e Kākā!" te kōrero atu o Kiwi. "Kāore au i te mōhio haha tēra kai tōna tuara, engari anō tēnei e mau nei ki tōna rekereke, kua kite mea pēnei au!" Te whakamārama atu a Kiwi.

"Ae, na taku hoa, na Hineora au i kōrero mai. He waewaerua a ia. He uwha." I te rongohanga o Kākā i ngā kōrero a Kiwi, i tata taka hoki a ia mai i te peka e noho ra ia. Putē mai ana ōna whatu i ngā kōrero a Kiwi.

"Me haere pea au ki te kōrero ki tō hoa, ki a Hineora nē Kiwi?" te pātai atu a Kākā.
"Ehē Kākā. Kāre toku hoa e mōhio ki te kōrero Kākā!"

Te Hui Kaituhi o Huia i tū ki Whakatane

He kupu mihi - he kōrero whakataki

Kia ora anō tātau te hunga i ngākau nui ki tēnei hui i ngā rā tata nei kua pahure. Harakoakoa ana te ngākau i tae wawe mai tātau ki taua hui rā. Ka mihi ki a koutou te hunga i tae ake, nā mātau o Huia te karanga, te pōhiri hoki, ā, ko koutou te hunga i huri mai ngā māhunga, i ara ake te tinana, i kuhu ki wā koutou waka ki te whakatinana i ngā wawata, i ngā tumanako, i ngā hiahia hoki mō tēnei hui. Nā koutou rawa i rangatira ai tēnei hui kaituhi o Huia. He mihi paku noa ēnei ki a koutou, ki a tātau katoa hoki i runga anō i ngā mahi i mahia i taua hui. Kāti, kia huri ake te aro ki ngā mahi i mahia.

Arā noa atu te whānui o te kupu, o te kōrero i whakaputaina, i rangonahia e tātau. Mai i ngā tohunga kua māro kē te haere i roto i ngā mahi tuhituhi, tae noa mai ki a tātau e noho pīpī heihei ana ki ēnei mahi. He momo, he momo. Ā, ko te tumanako kia whakakīkīhia ngā pokorua o ngā rauemi kei te reo Māori. Arā, ko ngā pukapuka "novels" me ērā atu o ngā momo pukapuka.

Hei tīmata ake i ngā kōrero kia huri ake tātau ki te pukapuka a Brigid Lowry, e kī ana;

WHY BEING A WRITER IS GOOD:
You get paid to make stuff up
You get to travel because it's research
You can stay home and work in your pyjamas

WHY BEING A WRITER IS BAD:
Sitting all by yourself in your study for hours is lonely

Koinei rā ētahi o ngā hua me ngā raru o te tuhituhi kōrero, arā atu anō pea ētahi, engari koinei ngā mea ka pōkia rā koe i te wā tuatahi, inā, noho ai koe he tuhituhi anahe ngā mahi.

He mahi pārekareka te tuhituhi. E kawea ai koe ki ngā haerenga pōhewa, ki te ao hoki o pae mahara. E hahua ake ai te aroha, te pōuritanga, te hokinga mahara ki wā tātau tipuna, koroua, kuia hoki, ki tētahi rānei kua ngaro atu. Kua tōia mai ki te māramatanga, kia tūhonohono ai anō tātau ki a tātau, tangata ki te tangata.



Anei ētahi pukapuka kua whakaputaina e Huia, ko "Whio" nā Materoa Haenga, ko "Raru" nā Waikare Kruger, ko "Ūkaipo" nā Hans Tiakiwai me "E te Tau" nā Manu Te Awa.

Koinei nga pukapuka i titoa mai e Katerina Te Heikoko Mataira, ko Rēhua, ko Hōkio me Maungaroa. Kei runga rawa atu te kuia nei me ōna mahi, kua roa hoki a ia e tuhituhi ana, e whakairo ana i wā tātau nā kupu ataahua ki te pukapuka.

Ka kite rā tātau e kare mā, ahakoa te iti o ngā rauemi i te reo Māori, ko ēra (o runga ake nei) kua oti noa, he taonga nō tuawhakarere. Whakamahia ēnei rauemi hei arataki haere i a koe i runga i tōu ake huarahi tuhituhi.

He pūrākau ...

Koinei te hui i tū ki Whakatane ki tētahi o ngā mōtera i reira. Ka wani kē te hui nei!

Ka rawe Piata, teitei kē tō tārere mai!

Hā! Kai hea kē koe Piata!

Ka pai kē, kua tae mai ngā kai... Ko te kai a te rangatira he kōrero, ko te kai a te TINO rangatira he kebabs, he henewiti, he whurutu, me ngā punua mince pies, ohhh, te reka hoki.

"Kare anō kia oti tō pūrākau kua kai tonu koe nē Ngāwai! Paaaai kare!"

Ā, anei ke koe e Piata e kai ana.

"Kia tika wā kōrua tuhinga e Kawata, kōrua ko Te Whetū!" te kī a Whaea Kararaina ki ngā tokorua rā.

"Ae, Whaea!"

Ko ngā taniwha whao i te kupu, i te kōrero, ēnei, e tātā ana i a Donald mō wana pikitia i tāngia e ia. (He kaitā pikitia mō ngā rā e heke mai ana.)

He noho he āta whakaaro ngā mahi mō ngā kōrero e tuhia ana...

Anei a Te Whetu e timata ana i tana Anthology o te kura o Rūātoki. "I au e haere ana ki te kura o Rūātoki, ko aku mahi he kai i ngā tina a ngā 3rd formers ..." me te kata anō a Te Whetu mō ana hokinga mahara.

"Ai, kaua e kape i waku mahi Ngāwai, kai hea kē wōu ake kōrero?" te kī a Hinekuoro. "Kua kore au e aro me aha au e Hine," te whakautu a Ngawaiata.